Euskal Saskibaloi Federazioaren hautaketa aurrekoek denboraldiko lehen entrenamenduak egin zituzten igandean, Espainiako Selekzioen Txapelketarako eta U15 kategorien Oliteko Txapelketarako prestaketa martxan jarriz.
Horrela, infantil eta kadete mailako taldeek, bai neska zein mutil, lehen lan saioa burutu zuten, eta haiekin batera hasi ziren U15 mailakoak, datorren azaroaren 22 eta 23ko asteburuan jokatuko den Oliteko BENNA proiektuko txapelketa prestatzen.

Leioan, Donostian eta Gasteizen lehen saioak

Leioako Irlandesas Ikastetxea izan zen jardunaldiaren erdigunea, bertan entrenatu baitzuten infantil eta kadete nesken hautaketa aurrekoek, baita infantil mutilenak eta U15 neskenak ere.
Bestalde, kadete mutilen hautaketa aurrekoak Donostiako Amenabar Arenan egin zuen bere lehen saioa, eta U15 mutilena Gasteizko San Prudencio Ikastetxean aritu zen lanean.
Guztira, ehun gaztetik gora aritu ziren entrenamenduan, giro bikain eta ilusioz beteriko batean.

Aurrerantzean, entrenamenduak igandero

Lehen jardunaldi hau izango da igandero egingo diren entrenamenduen abiapuntua.
Momentuz, deialdiak bere horretan mantenduko dira, eta azaroaren 16an, hurrengo igandean, talde guztiak berriro bilduko dira ordu eta egoitza berdinetan.

Infantil eta kadete taldeek Espainiako Txapelketarako prestaketa tekniko eta taktikoan jarriko dute arreta, eta U15 taldeek, berriz, Oliteko hitzordua izango dute begiz jota, esperientzia eta lehia maila handiagoa irabazteko aukera paregabea izango baita.

Lehen balorazio onak

Jon Uriarte, infantil nesken hautatzaileak, pozik baloratu zuen lehen eguna:

“Hasierako urduritasuna izan arren, neskek oso ondo erantzun dute. Ausartak izan dira, saiatu dira eta gogor lan egin dute.”

Uriartek azaldu zuen orain jarraipena emango diotela astez aste:

“Hemendik aurrera igandero entrenatuko dugu; saio bakarrak eta bikoitzak tartekatuz, txapelketara iritsi aurretik ahalik eta prestaketa onena egiteko.”

Begirada Olitera

U15 taldeek lan berezia dute aurretik, Oliteko txapelketa izango baita euren lehen helburua. Joel Mieza, Euskadi U15 nesken hautatzaileak, honako hau nabarmendu zuen:

“Helburua da jokalariek esperientzia desberdin bat bizitzea, maila handiko jokalarien aurka lehiatzea eta lehiakortasun maila pixka bat igotzea.”

Miezak azpimarratu zuen denbora gutxirekin ari diren arren, ilusioa eta gogoa sobera dutela:

“Denbora gutxi dugu, baina klubetan egiten den lan maila oso ona da, eta jokalarien ilusio eta prestutasun maila altuak asko laguntzen du emaitza onak lortzen.”

Lana, ilusioa eta konpromisoa

Lehen entrenamendu hauekin, Euskadiko hautaketa aurrekoek prestaketa aldia ofizialki abiatu dute.
Aurrerantzean, igandero entrenatuko dute, eta azaroaren 16ko saioan jarraituko dute norabide berean, Espainiako Txapelketara eta Oliteko U15 lehiaketara begira.

Lehen jardunaldi hau lan, ilusio eta konpromiso giroan burutu da, eta argi geratu da talde guztiek gogotsu ekingo diotela denboraldiko erronka nagusiari: Euskadiren izena goian uztea.