Asteburuan hasi zen Lehen Mailako Igoera Fasea, etxean jokatu zuten taldeen garaipenekin: Universidad Deusto Loiola Indautxu eta Navarro Villoslada Basket Navarra. Eta Bigarren Mailakoan, Afilados Gasteiz Araba eta Txintxu Gozotegia ISB porrotik gabeko liderrak dira.
LEHEN MAILA – IGOERA FASEA
Aste bat geroago Nafarroako derbia errepikatu zen, baina garaile desberdinarekin. Navarro Villoslada Basket Navarrak garaipen erosoa lortu zuen (75-52), Aranguren Mutilbasket-en aurka, bigarren zati handiari esker (43-25).
Berdintasun gehiago Bilboko Jesuitas Ikastetxean, lehen faseko lehen bi sailkatuen arteko lehian. 10 puntugatik irabazten joan zen Universidad Deusto Loiola Indautxu bigarren laurdenean (32-22), baina Araskik buelta eman zion azkenengoan (52-53). Emozioz beteriko azken txanpa eta, Badiolak huts egindako libre baten ondoren, gasteiztarrek bi aukera izan zituzten partida berdintzeko, baina ez zuten lortu (67-65).
LEHEN MAILA – FEDERAZIOA KOPA
Bere bolada onean mantentzen da Campus Promete, Bera Bera Bultz berriro gainditu eta gero (65-74). Errioxarrak lehen postuan daude, Lointek Gernikarekin berdinduta: bizkaitarrek Easo Lorea Gourmet taldeari irabazi zioten, 69-74ko emaitzarekin, azken laurdenean erremontada ona sortu ostean.
Leioa SBT-ak agur esan zion liderren multzoari Kandelazubietan Megacalzado Ardoiren aurka galdu eta gero, bi luzapen behar izan zituen partida batean. Eta beheko postuetako lehian, Tabirako Baquek La Rioja ABN-ri irabazi zion (62-53).
BIGARREN MAILA – IGOERA FASEA
Pauso aurrera eman dute Txintxu Gozotegia ISB-ak zein Afilados Gasteiz Arabak. Gipuzkoarrek denboraldiko lehen porrota endosatu zuten San Ignaciori (67-44), hasieratik amaierara nagusitu ziren neurketan.
Eta Logroñon, gasteiztarrek azken laurdenaren hasieran (4-13ko partziala) bizkortu zuten lehen postuan mantentzeko porrotik gabe.
Jardunaldiko azken partidan, Iruñean jokatutakoa, Askartza Claretek fase berriaren lehen garaipena eskuratu zuen (52-58), Kaleangora Liceo Monjardín-en kantxan.
BIGARREN MAILA – FEDERAZIOA KOPA
Bera Bera Goikoa eta Navasket taldeek laugarren garaipena gehitu zuten. Donostiarrek Inmobiliaria Dato40 Toju-ri irabazi zioten (41-48), gasteiztarren hasiera bikaina (23-9) gainditu eta gero. Eta nafarrek irabazi egin zuten Lagunak Furgovip-en aurkako derbian (81-74). 16 puntuko aldea etxekoentzat hirugarren laurdenean (51-35) eta bisitarien erreakzioa (58-57). Azken laurdenean, hasierako 15-2ko partziala.
Eta Gobelan, Getxoren azken laurden handia Atlético San Sebastián-i irabazteko (53-41).
